Aram Mansang ke Mua

“ENTI KITAI SAMA BANSA, PEMIMPIN ARI BANSA KITA SAMA PENEMU, BEPADU SERETA BERSATU, KITAI DEKA ULIH MEGAI MENUA”….

SNAP iya nya sebuah parti kita dayak ke terubah dalam kandang 1961 suba. Dasar tetubuh parti tu iya nya deka nyaga kepentingan kitai bansa Iban. Ari parti tu suba orang Dayak ti kepenulu ti udah dipadu ke nya kepala menteri Sarawak iya nya Tan Sri Stepan Kalong Ningkan. Sekumbang kitai dayak begerempung dalam parti nya (SNAP), kitai bansa dayak maya nya bersatu sereta berpadu nya mh nyunjung ke kitai bansa dayak ulih dipaduka nyadi kepada menteri sarawak kepenulu. Ranggur ti deka ngempung sereta ngempuru ka semua bansa dayak dalam siti parti (SNAP) gagal udah ke semua pemimpin kitai bansa dayak dalam parti nya enda saum penemu. Pengudah nya lalu nyunjung bansa kitai bepecah ngagai 3 kelompok iya nya sekeda nitih ke Tan Sri William Mawan (SPDP), sekeda agi nitih ka Tan Sri Dr. Leo Moggie (PBDS) lalu iya ke bukai mengkang ba SNAP. Krisis ti nuntung parti PBDS mega nyunjung bansa kitai dayak berpecah baru, sekeda nitihka Tan Sri James Masing ba Parti Rakyat Sarawak (PRS) lalu sekeda nubuh ka Kongres Dayak Malaysia (MDC) tang parti tu enda ulih diregister Pendaftar Pertubuhan (ROS) sebagai parti politik lalu nyunjung bansa kitai dayak dalam MDC masuk pembangkang. Sampai ke diatu bansa kitai ari siti bansa ti bepadu suba berpecah ngagai 4 kelompok, ba baruh parti SNAP, SPDP, PRS sereta pembangkang.

Ba runding aku, ketegal bansa kitai bepecah nya mh alu nyunjung ka bansa kitai enda ulih bersatu, berpadu baka bansa bukai. Ambi ka banding, maya kitai bansa dayak berpadu dalam SNAP suba nyunjung bansa kitai ulih dipadu ka nyadi Kepala menteri Sarawak ke penulu. Sampai ke diatu, pengudah Tan Sri Stepan Kalong Ningkan sereta Dato’ Penghulu Tawi Sli ti udah dipadu ka nyadi kepala menteri Sarawak alu nadai agi kitai ari bansa Dayak ke megai tangung pengawa nya agi.. 

Nya mh, ENTI KITAI SAMA BANSA, PEMIMPIN ARI BANSA KITA SAMA PENEMU, BEPADU SERETA BERSATU, KITAI DEKA ULIH MEGAI MENUA.

Bah, kati ko runding kita deh?? Tu ukai semata-mata berpolitik, tang kena ngidupka semangat BERPADU sereta BERSATU kitai dulu suba awakka bansa kitai enda lenyau ba dunya..
IDUP DAYAK!!! SEAGI KITAI IDUP, SEAGI NYA KITAI TEGUH ENDA MUDAH RAPUH, BEPADU, SERETA ANGKAT NGIDUP KE NAMA BANSA KITAI…..